Mat 14 | WSK | STEP | Tom mu te Galilee sor ko kari supuling Herod nu Jesus ko den ikiam,

Matthew 14

Anuwa Kari John kueram

(Mark 6:14-29; Luke 3:19-20; 9:7-9)

1 Tom mu te Galilee sor ko kari supuling Herod nu Jesus ko den ikiam, 2 ale nu ko ura kari iwita nunga maonam, “Imi mu Anuwa Kari John kueram bare aking maragaram pa!” mam. “Uwutata se nu kilek bibiya ewere beteso.”

3 Anuwa Kari John kueram ko dugu duap mu iwita. Herod mu nu ko uria Philip ko nuwus Herodias tam, ale noko imet ko awuram ale ilak bagakaso. Se John Herod iwita manaruwakaso, “Ni imet sumu taem bare munan sumu me terong!” makaso. Se umutang ko Herod balam se John iluman ale talipara kawam ningi beteman se bagakaso. 5 Ale nu John morukko kaeyakaso, bare nu Juda alo nunga nguangakaso. Mu awuk, nuna ikikasan John mu prophet makasan.

6 Se tom Herod noko tom te bilangaram mu te nama aragaman, mu Herodias ko nanawus kariimet suen biya nongoma te irukaso. Se Herod ninguru ko amilmilakaso, 7 ale maonam, “Nunguningta nunguning,” mam, “ni mel bo ko balu mu ani am kisekko,” mam. 8 Se nuam ko ikia ko nanawus tuam se te balam, “Anuwa Kari John dogotak bataguru ale ko supuling to ale taiwir tatam bo te bitar ale ani aisuko!” mam.

9 Se Herod den mu ikiam ale ninguru noman batagakaso. Bare nu den noko saki alo taiman se nomokete den nunguningta nunguning balam wore ko ikia tokaso. Buta se nu balam, “Noko mel ko balso mu am tualko,” mam. 10 Se kari sang talipara kawam ningi namaman John ko dogotak batagorman. 11 Ale ko supuling taiwir tatam bo te beteman karogo taiman kuriang itiwik mu tuman, se nu giam karogo namaram ale nuam tuam.

12 Bare John ko olekem namaman ale ko kumik guang giman karogo nama mutim tuguman. Asele namaman Jesus manorman.

Jesus kari 5000 na nungaram

(Mark 6:31-34; Luke 9:10-17; John 6:1-13)

13 Se Jesus John kueram mu ko den ikiam, ale wonong umutang beteram, ale tetela la dal tam ale sor ipi kariimet mena mu te namakaso. Bare kariimet ko ikiman, ale nunga wonong sor beteman ale aolak iluman kowom karoman. 14 Se Jesus dal te nama saun te aratam mu kariimet suen biya bolala awuman bagakasan mu nungarkam, ale nunga gomang batagam, se nunga saki kuera ikes ago mu nunga nungam.

15 Se sor baingam se ko olekem kote taiman ale balman, “Sor baingam taiso se kuwim imi te betela wonong bo mena. Se ni kariimet imi nunga awur se wonong wonong namomon ale na diamonko.”

16 Bare Jesus nunga maonam, “Nuna anape ko namomonko ya? Mu nina nengeta na nungaral se namonko.”

17 Bare nuna balman, “Ana na suen biya imi te me aniso. Mu bread 5 se wal ilagala buta aniso,” maman.

18 Se nu balam, “Mu gial ago aningate tairalko,” mam. 19 Ale nu kariimet nunga maonam se sirsir te dagiman. Se nu bread 5 se wal ilagala buta giam, taiti kuali loaga se Kaem aru maonam. Asele nu bread pakokaram se kaparam se ko olekem alo nungaram. Se nuna giman kariimet nungaru nungaru karogo namaman. 20 Se kariimet na naman nungumik karogo terong ma muruwuram. Asele olekem na nukum wogaram mu korokem 12 tuguman se kuring aratu namaram. 21 Se kari na naman mu nunga tom 5000 iwita. Se imet kuriang mu karogotala bare me nunga kauman.

Jesus yu guang awete aolak iluwam

(Mark 6:45-52; John 6:15-21)

22 Se Jesus ko olekem tairate nunga diruwuram ale nunga maonam, “Nina giral dal te aragal ale yu batoga komasang te nama sagaralko,” mam. “Se ani kariimet nunga awurek se namomon asele udagi tairikko,” mam. 23 Se nu kariimet nunga maonam se nama kutuwuman, asele nu kota Kaem aru manukko duruk bo te nama tarigiram.

Se sor bainga turom karogo mu nu kota duruk te bagakaso. 24 Bare dal mu yu batoga kusumuri namawakaso. Se daula biya dal koma ko gira te taikaso ale dal sapakaso se tarigi kapakaso. 25 Se ukira luan karogo mu Jesus yu guang awete aolak iluwam ale nongote taiwakaso. 26 Se olekem alo nu yu guang awete aolak iluwam taiwaram se aringiman bo ko ninguru biririkiman ale balman, “Imi wit mairap bo taiwoso agila pa!” ma balman. Ale ninguru nguangakasan ale ninguru tala niakasan.

27 Bare tairatela Jesus nunga maonam, “Sokel ago bagaralko! Imi anigita! Me nguangaralko!” mam.

28 Se Peter balam, “Kari Biya, ni borta agi mu, balu se ani yu awete aolak iluwek ale nikate namirikko,” mam.

29 Se Jesus balam, “Buta tairko!”

Se Peter dal beteram ale yu guang la aolak iluwam ale Jesus kote namurukko namakaso. 30 Bare nu daula biya arigam ale nguangaram ale yu ningi kapa se airam balam, “Kari Biya, ni aninga sangaruko!”

31 Se tairatela Jesus kuting garukuam Peter iluwam ale maonam, “Nika gemang ningi nunguning mu katirta pa!” mam. Ale “Anape ko gemang namoso taiso ya?” mam.

32 Asele nuna ilagala la dal te aragaman se daula menaram. 33 Se olekem dal te animan mu nuna noko nup patowaman ale balukasan, “Nunguningta! Ni Kaem ko Kuriang!” makasan.

Jesus Gennesaret kariimet kuera ikes karogo mu suen biya nunga nungam

(Mark 6: 53-56)

34 Nuna yu luan batagorman ale Gennesaret sor te kasu kapaman. 35 Se sor mu ko kariimet nuna Jesus aringiman mu “Nu kota diram pa!” maman, ale den beteman se sor pingi pingi mu te geragam. Se kariimet nunga saki alo kuera ikes karogo mu arungak Jesus kote taiman. 36 Ale nu isarukasan, kariimet kuera ikes karogo mu noko guang norogen la ilu tamonko makasan. Se suen la ko guang norogen ilu tokasan mu nungia gilingikasan.